Baiboly Malagasy

Mpitoriteny 10: 1-20

Andininy

Protestanta Malagasy

Ny fatin-dalitra mahamaimbo sy mampamorivory ny menaky ny mpangaroharo zava-manitra; ary toy izany, ny fahadalana kely dia mavesatra noho ny fahendrena sy ny voninahitra.

Ny fon'ny hendry dia eo ankavanany; fa ny fon'ny adala kosa dia eo ankaviany.

Ary koa, raha mandeha eny an-dàlambe ny adala dia levona ny fahalalany, ka milaza tena amin'ny olona rehetra izy fa adala.

Raha tezeran'ny mpanapaka hianao aza miala amin'ny fitoeranao; fa ny fahatsindriam-po mahasakana ny fahadisoana lehibe.

Misy ratsy efa hitako aty ambanin'ny masoandro, ka toa fahadisoana ataon'ny mpanapaka izany;

Asandratra ho ambony indrindra ny adala, ary ny mpanan-karena mipetraka eo amin'ny toerana ambany.

Efa hitako ny mpanompo mitaingin-tsoavaly, ary ny mpanapaka kosa mandeha an-tongotra toy ny mpanompo.

Izay nihady lavaka no ho latsaka ao, ary izay mandrava fefy vato no hokekerin'ny menarana.

Izay manovoka vato dia haratrany, ary izay mamaky hazo no ho voany.

Raha dombo ny antsy ka tsy asainy, dia tsy maintsy manao an-teninaina izy; fa fahendrena no mahasoa, satria mahalavorary ny raharaha izany.

Raha manaikitra ny menarana, satria tsy mbola nasiana ody, dia ahoana no mahatsara ny mpanao ody?

Soa ny teny aloaky ny vavan'ny hendry fa ny molotry ny adala kosa mitelina ny tenany.

Ny fiandohan'ny teny aloaky ny vavany dia fahadalana, ary ny fiafaran'ny teniny dia fahavezeran-tsaina mampidi-doza.

Maro teny ny adala; nefa tsy misy olona mahalala izay ho avy; ary iza no mahalaza aminy ny ho avy any aoriany?

Ny fisasaran'adala mahareraka azy, fa ny làlana mankainy an-tanàna aza tsy fantany akory.

Lozanao, ry tany, raha zaza no mpanjakanao, ary ny lehibenao homa-maraina!

Sambatra kosa hianao, ry tany, raha tena karazan' andriana no mpanjakanao, ary ny lehibenao homana amin'izay fotoana mety, mba hampahatanjaka ny tenany, fa tsy ny hampahamamo azy!

Ny fahalainana be no mampianjera ny lohatrano, ary ny hakamoan'ny tànana mampitete ny trano.

Ataony laolao ny hanina ary ny divay no maharavoravo ny aina, ary ny vola hahazoana ny zavatra rehetra.

Aza manozona ny mpanjaka na dia amin'ny eritreritrao aza; ary aza manozona mpanan-karena na dia ao anatin'ny efitra fandrianao aza; fa na dia ny voro-manidina aza anie ka hitondra ny feo, ary na dia ny manana elatra dia hanambara ny teny.

Mpitoriteny 9 Mpitoriteny 10 Mpitoriteny 11

Fitadiavana andininy

Boky Toko Andininy Andininy farany

Louis Segond	Grika TV WH - UBS4
Basic English Bible	Hebreo TT WLC

Fitadiavana teny

Mampidira teny Litera 2 h@ 50 @ alfabeta

Asehoy koa ny ndininy amin'ny dikanteny hafa