Baiboly Malagasy

Andininy

Protestanta Malagasy

1

Ny tenin'i Jehovah izay tonga tamin'i Jeremia mpaminany ny amin'ny Jentilisa.

2

Ny amin'i Egypta. Ny amin'ny miaramilan'i Farao-neko, mpanjakan'i Egypta, izay teny amoron'ny ony Eofrata, tany Karkemisy, dia ilay resin'i Nebokadnezara, mpanjakan'i Babylona, tamin'ny taona fahefatra nanjakan'i Joiakima, zanak'i Josia, mpanjakan'ny Joda:

3

Mitaova amin'ny ampinga kely sy ny ampinga lehibe, Ka mandrosoa hiady;

4

Fehezo amin'ny kalesy ny soavaly, Ary itaingeno ny soavaly fitaingina; Mijoroa tsara hianareo, ka samia misatroka fiarovan-doha; Fotsio ny lefona, Miakanjoa ny akanjo fiarovan-tena.

5

Indrisy ny ahitako azy! raiki-tahotra sy miamboho izy, Ary ny maheriny aza dia efa ripaka, Samy miezaka mandositra izy ka tsy miherika akory; Fa misy fampangorohoroana manodidina, hoy Jehovah.

6

Tsy ho afa-mandositra ny haingan-tongotra, Na ho afaka ny mahery; Any avaratra eo amoron'ny ony Eofrata No hahatafintohina sy hahalavo azy.

7

Iza moa izato mizotra tahaka an'i Neily, Ary ny onjany misamboaravoara tahaka ny renirano?

8

Egypta mizotra tahaka an'i Neily, Ary ny onjany misamboaravoara tahaka ny renirano; Ary hoy izy: Hizotra aho ka hanafotra ny tany; Haringako ny tanàna sy ny mponina ao aminy.

9

Miakara, hianareo soavaly, ary miriota toy ny adala, hianareo kalesy; Ary aoka hivoaka ny lehilahy mahery, Dia ny Etiopiana sy ny Lybiana,[Heb. Pota.] izay mitana ampinga, Ary ny Lydiana,[Heb. Loda.] izay mitana sy manenjana tsipìka.

10

Fa izao andro izao dia an'i Jehovah, Tompon'ny maro, Ho andro famaliana hamaliany ny fahavalony; Ary ny sabatra hihinana ka ho voky Sy ho mamon'ny ran'ireo; Fa ny Tompo, dia Jehovah, Tompon'ny maro, no mamono zavatra hatao fanatitra Any amin'ny tany avaratra ao amoron'ny ony Eofrata.

11

Miakara any Gileada, ka makà balsama, Ry Egypta zanakavavy virjina; Foana ny nanaovanao fanafody maro, Fa tsy manana plasitera hapetaka amin'ny ferinao hianao,

12

Efa ren'ny firenena ny henatrao, Ary ny fiantsoantsoanao nanenika ny tany; Fa mifandona ny samy mahery, Ka miran-davo izy roa tonta.

13

Ny teny izay nolazain'i Jehovah tamin'i Jeremia mpaminany ny amin'ny hihavian'i Nebokadnezara, mpanjakan'i Babylona, hamely ny tany Egypta.

14

Ambaraonareo any Egypta, ary torio any Migdola, Eny, torio any Memfisa[Heb. Nofa.] sy Tapanesa, Ka ataovy hoe: Mijoroa tsara hianao, ka miomàna; Fa mandringana manodidina anao ny sabatra.

15

Nahoana no voapaoka ny maherinao? Tsy nahafantatra izy, satria Jehovah no nandroaka azy.

16

Efa nahatafintohina ny maro Izy, Ka lavo mifanindry ireo; Dia hoy ireo: Mitsangàna, ka andeha isika hiverina ho any amin'ny firenentsika Sy ho any amin'ny tany nahaterahantsika Ho afaka amin'ny sabatra mandoza,

17

Nitaraina izy hoe: Tabataba foana Farao, mpanjakan'i Egypta, Efa nandiso fotoana izy.

18

Raha velona koa Aho, hoy ny Mpanjaka, Jehovah, Tompon'ny maro, no anarany: Tahaka an'i Tabara amin'ny tendrombohitra, Sy tahaka an'i Karmela ao amoron-dranomasina, dia ho tahaka izany no hihaviany.

19

Ry Egypta zanakavavy mponina, Mifeheza entana ho entinao any amin'ny fahababoana; Fa ho tonga tany lao Memfisa,[Heb. Nofa.] Eny, hodorana izy, ka tsy hisy mponina.

20

Egypta dia tahaka ny ombivavy kely tsara tarehy dia tsara tarehy; Fa injay! tamy, eny, tamy ny fihitra avy any avaratra!

21

Na dia ny olona karamaina ao aminy aza, izay tahaka ny ombilahy kely mifahy, Ireny koa dia mihodina ka samy mandositra avokoa; Tsy mahajanona izy, Fa efa tonga aminy ny andro hahitany loza, Dia ny andro hamaliana azy.

22

Ny feony dia toy ny fitsaotsaoky ny menarana mandeha; Fa mandeha hitondra miaramila izy Ka avy hamely azy amin'ny famaky Toy ny mpikapa hazo.

23

Kapainy ny alany, hoy Jehovah, Satria efa nikirindro loatra; Fa maro noho ny valala izy Ka tsy tambo isaina.

24

Ho afa-baraka Egypta zanakavavy, Hatolotra eo an-tànan'ny olona avy any avaratra izy.

25

Ary hoy Jehovah, Tompon'ny maro, Andriamanitry ny Isiraely; Indro, hovaliako Amona avy any Nô Ary Farao sy Egypta Mbamin'ny andriamaniny sy ny mpanjakany, Dia Farao sy izay rehetra matoky azy;

26

Ary hatolotro eo an-tànan'izay mitady ny ainy izy, Dia eo an-tànan'i Nebokadnezara, mpanjakan'i Babylona, Sy eo an-tànan'ny mpanompony; Ary aorian'izany, dia handry fahizay[Na: honenana indray.] toy ny tamin'ny andro fahiny ihany izy, hoy Jehovah.

27

Fa aza matahotra hianao, ry Jakoba mpanompoko, Ary aza mivadi-po, ry Isiraely; Fa, indro, hovonjeko avy any amin'ny lavitra hianao, Ary ny taranakao avy any amin'ny tany nahababo azy; Dia hiverina Jakoba ka hiadana, Eny, handry fahizay izy, ka tsy hisy hanaitaitra azy.

28

Aza matahotra hianao, ry Jakoba mpanompoko, hoy Jehovah, Fa momba anao Aho; Fa na dia levoniko aza ny firenena rehetra izay nandroahako anao, Hianao tsy mba holevoniko, Nefa kosa mba hanariko araka ny antonony ihany hianao, Fa tsy dia havelako fotsiny.

Louis Segond	Grika TV WH - UBS4
Basic English Bible	Hebreo TT WLC