Baiboly Malagasy

Andininy

Protestanta Malagasy

1

Miezaha mitady ny fitiavana, nefa maniria fatratra ny zava-panahy koa, indrindra fa ny haminany.

2

Fa izay miteny amin'ny fiteny tsy fantatra dia tsy miteny amin'olona, fa amin'Andriamanitra; fa amin'ny fanahy no itenenany zava-miafina, ka tsy misy olona mahalala;

3

fa izay maminany kosa miteny amin'olona ho fampandrosoana sy ho famporisihana ary ho fampiononana.

4

Izay miteny amin'ny fiteny tsy fantatra dia mampandroso ny tenany; fa izay maminany kosa mampandroso ny fiangonana.

5

Tiako raha samy hiteny amin'ny fiteny tsy fantatra hianareo rehetra; nefa aleo haminany; fa izay maminany dia lehibe noho izay miteny amin'ny fiteny tsy fantatra, raha tsy mandika teny koa izy hahazoan'ny fiangonana fampandrosoana.

6

Nefa, ry rahalahy, raha mankeo aminareo aho ka miteny amin'ny fiteny tsy fantatra, inona moa no soa ho vitako aminareo amin'izany, raha tsy fanambarana, na fahalalana, na faminaniana, na fampianarana, no hitenenako aminareo?

7

Ary ny zavatra tsy manana aina, na sodina, na lokanga, na dia maneno aza, raha tsy manao feo samy hafa, ahoana no hahafantarana izay ataony na amin'ny sodina, na amin'ny lokanga?

8

Fa raha manao feo hafahafa ny trompetra, iza no hiomana hiady?

9

Dia toy izany koa hianareo: raha tsy mazava ny teny aloaky ny vavanareo, hatao ahoana no fahafantatra izay lazainareo? Fa raha tsy izany, dia hiteny amin'ny rivotra hianareo.

10

Misy fiteny maro samy hafa amin'izao tontolo izao, ka samy manana ny heviny avy.

11

Koa raha tsy mahalala ny hevitry ny fiteny aho, dia ho vaka amin'izay miteny, ary izay miteny ho vaka amiko kosa.

12

Ary toy izany ihany koa hianareo: raha fatra-paniry ny zava-panahy, dia izay hampandroso ny fiangonana no tadiavo indrindra.

13

Koa aoka izay miteny amin'ny fiteny tsy fantatra hangataka mba hahay mandika teny koa.

14

Fa raha mivavaka amin'ny fiteny tsy fantatra aho, dia ny fanahiko ihany no mivavaka, fa ny saiko kosa tsy mahavanona.

15

Ahoana ary no izy? Sady hivavaka am-panahy no hivavaka an-tsaina koa aho; sady hihira am-panahy no hihira an-tsaina koa aho.

16

Fa raha misaotra am-panahy fotsiny ihany hianao, hataon'izay tsy mahay ahoana no hanao 'Amena' raha misaotra hianao? Satria tsy mahalala izay lazainao izy.

17

Fa hianao dia misaotra tsara ihany, nefa ny hafa kosa tsy mba ampandrosoina.

18

Misaotra an'Andriamanitra aho fa miteny amin'ny fiteny tsy fantatra mihoatra noho hianareo rehetra aho;

19

nefa raha ao am-piangonana, dia aleoko manao teny dimy fantatry ny saiko mba hampianarako ny sasany koa, toy izay hanao teny iray alina amin'ny fiteny tsy fantatra.

20

Ry rahalahy, aza mba ho zaza amin'ny fahalalana: raha amin'ny lolompo dia aoka ho zaza-bodo aza, fa amin'ny fahalalana kosa dia aoka ho lehilahy tokoa.

21

Voasoratra amin'ny lalàna hoe: Amin'ny olona hafa fiteny sy amin'ny molotry ny olon-kafa no hitenenako amin'ity firenena ity; fa na dia amin'izany aza dia tsy hihaino Ahy izy, hoy Jehovah (Isaia 28:11-12) .

22

Koa ny fiteny tsy fantatra dia famantarana amin'ny tsy mino fa tsy amin'ny mino; fa ny faminaniana kosa dia amin'ny mino, fa tsy amin'ny tsy mino.

23

Koa raha vory ny mpiangona rehetra, ary ny olona rehetra samy miteny amin'ny fiteny tsy fantatra, ary miditra ny tsy mahay, na ny tsy mino, tsy holazainy va fa very saina hianareo?

24

Fa raha samy maminany izy rehetra, ary miditra ny tsy mino, na ny tsy mahay, dia ho voan'ny anatra ataon'izy rehetra izy sady hotsarain'izy rehetra;

25

ka dia miseho ny zavatrra takona ao am-pony, dia hiankohoka izy ka hivavaka amin'Andriamanitra sady hilaza fa Andriamanitra dia ao aminareo marina tokoa.

26

Ahoana ary no izy, ry rahalahy? Raha miangona hianareo, misy ta-hanao hira hianareo, misy ta-hanao fampianarana, misy manana fanambarana, misy manana fiteny tsy fantatra, misy manana fandikan-teny. Aoka ny zavatra rehetra hatao ho fampandrosoana.

27

Raha misy miteny amin'ny fiteny tsy fantatra, dia avelao ho roa na telo, fa aza atao mihoatra noho izany, ka ampifanarakarahina; ary avelao hisy iray mandika teny.

28

Fa raha tsy misy mpandika teny, dia aoka izy hangina eo amin'ny fiangonana; fa aoka hiteny amin'ny tenany sy amin'Andriamanitra ihany izy.

29

Ary aoka ny mpaminany roa na telo no hiteny, fa aoka ny hafa hamantatra.

30

Fa raha misy tsindrian'ny Fanahy ao am-pipetrahana, dia aoka hangina kosa ny voalohany;

31

fa mahazo maminany tsirairay hianareo rehetra, mba hianaran'izy rehetra sy hamporisihana azy rehetra;

32

ary ny fanahin'ny mpaminany dia manaiky hozakain'izy mpaminany.

33

Fa Andriamanitra tsy tompon'ny fikotranana, fa tompon'ny fiadanana. Araka ny fanaon'ny fiangonan' ny olona masina rehetra,

34

dia aoka hangina ny vehivavy raha ao am-piangonana fa tsy avela hiteny izy, fa aoka hanoa tsara araka ny lazain'ny lalàna koa.

35

Ary raha misy tiany hianarana, dia aoka izy hanontany ny lahy raha mby any an-trano; fa mahamenatra raha miteny ao am-piangonana ny vehivavy.

36

Ary aminareo va no nihavian'ny tenin'Andriamanitra, sa ao aminareo ihany no nahatongavany?

37

Raha misy manao azy ho mpaminany, na ho manana fahaizam-panahy, dia aoka ho fantany tsara fa didin'ny Tompo ny teny izay soratako ho aminareo.

38

Fa raha misy tsy mahalala, dia avelao tsy hahalala ihany izy.

39

Koa amin'izany, ry rahalahiko, maniria fatratra ny haminany ary aza mandrara tsy hiteny amin'ny fiteny tsy fantatra;

40

kanefa aoka ny zavatra rehetra hatao amin'ny fahamendrehana sy ny filaminana.

Louis Segond	Grika TV WH - UBS4
Basic English Bible	Hebreo TT WLC