Baiboly Malagasy

Joba 24: 1-25

Andininy

Protestanta Malagasy

Nahoana no tsy misy fotoan'andro voatendrin'ny Tsitoha, Ary nahoana no tsy hitan'ny mahalala Azy izany androny izany?

Misy mamindra fari-tany Sy mangalatra omby aman-ondry sady miandry azy.

Mandroaka ny borikin'ny kamboty izy, Ary maka ny ombin'ny mpitondratena ho tsatôka.

Manosika ny mahantra hiala amin'ny làlana izy, Ka dia miery azy avokoa ny malahelo amin'ny tany.

Indro, tahaka ny fivoaky ny boriki-dia any an-efitra No fivoak'ireny ho amin'ny asany hiremby; Ny tani-hay no ahazoany hanina ho an'ny zanany.

Any an-tsaha izy maka vilona Sy mitsimpontsimpona ny voaloboky ny ratsy fanahy.

Mandry mitanjaka amin'ny alina izy, satria tsy manan-damba, Ka dia tsy manana firakotra amin'ny hatsiaka;

Kotsan'ny ranonoram-baratra any an-tendrombohitra izy, Ka mitampisaka amin'ny vatolampy, fa tsy manam-pialofana.

Misarika ny kamboty eo am-pinonoana izy Ary maka tsatôka amin'ny ory.

Mandeha mitsaitsaika ireo, fa mitanjaka tsy manan-kitafy, Ary noana eo am-pitondrana ny amboaram-bary

Manao diloilo eo anatin'ny tambohon'ny mpampahory azy [Heb. tambohon'ireny.] izy; Ary manosihosy ny famiazam-boaloboka izy, nefa mangetaheta ihany.

Mitrona ny lehilahy ao an-tanàna, Ary mitaraina ny fanahin'ny voalefona; Nefa tsy ahoan'Andriamanitra akory ny ratsy atao.

Ireny no mpikomy amin'ny mazava; Tsy mba mihevitra ny làlany izy, Na mitoetra eo amin'ny alehany.

Raha vao mangiran-dratsy, dia mifoha ny mpamono olona; Mamono ny ory sy ny malahelo izy, Ary nony alina, dia tahaka ny mpangalatra.

Ny mason'ny mpijangajanga miandry ny maizimaizina, Ka hoy izy: Tsy misy hahalala ahy; Ka dia manao very maso izy.

Misy manamy trano nony maizina; Nefa nony antoandro dia miery izy; Tsy mahalala ny mazava izy;

Fa ny aizim-pito [Heb. aloky ny fahafatesana.] no marainan'ireo rehetra ireo; Satria efa mahazatra azy ny fampahatahoran'ny aizim-pito [Heb. aloky ny fahafatesana.] izy.

Mitsinkafona paohin'ny rano izy; Voaozona ny anjarany eo amin'ny tany; Tsy mivily ho amin'ny làlana mankeny amin'ny tanimboaloboka izy.

Toy ny andevonan'ny maina sy ny mafana ny ranom-panala No andevonan'ny fiainan-tsi-hita [Heb. Sheola] ny mpanota.

Manadino azy ny vohoka; manjary hanim-py ho an'ny olitra izy Ka tsy tsarovana intsony; Ary tapaka tahaka ny hazo ny ratsy fanahy, [Heb. faharatsiana.]

Dia ilay nandroba ny momba izay tsy niteraka Ary tsy nanisy soa ny mpitondratena.

Kanefa halavain'Andriamanitra amin'ny heriny ny andron'ny olo-mahery; Mitsangana indray ireo, na dia tsy nanampo izay ho velona intsony aza.

Ataony mandry fahizay sy tsara tohana izy, Sady tsinjoviny mandrakariva ny làlany.

Nasandratra izy, kanjo vetivety dia tsy ao intsony, Dia mihalevona izy ka otazana tahaka ny olona rehetra, Ary tangosana tahaka ny salohim-bary.

Raha tsy izany, dia aoka hisy hamaky lainga ahy Ka hampiseho ny teniko ho tsinontsinona.

Joba 23 Joba 24 Joba 25

Fitadiavana andininy

Boky Toko Andininy Andininy farany

Louis SegondGrika TV WH - UBS4
Basic English BibleHebreo TT WLC

Fitadiavana teny

Asehoy koa ny ndininy amin'ny dikanteny hafa