Baiboly Malagasy

Ohabolana 22: 1-29

Andininy

Protestanta Malagasy

Aleo ho tsara laza toy izay ho be harena, Ary tsara ny fitia noho ny volafotsy sy ny volamena.

Mihaona ny manan-karena sy ny malahelo; Fa Jehovah no Mpanao azy roa tonta.

Ny mahira-tsaina mahatsinjo ny loza ka miery; Fa ny kely saina kosa mandroso ka voa.

Ny valin'ny fanetren-tena sy ny fahatahorana an'i Jehovah Dia harena sy voninahitra ary fiainana.

Tsilo sy fandrika no amin'ny alehan'ny maditra; Fa izay te-hiaro ny ainy dia manalavitra izany.

Zaro amin'izay làlana tokony halehany ny zaza, Ka na rehefa antitra aza izy, dia tsy hiala amin'izany.

Ny manan-karena dia manapaka ny malahelo, Ary izay misambotra dia mpanompon'ny mampisambotra.

Izay mamafy heloka dia hijinja fahoriana, Ary ho levona ny tsorakazon'ny fahatezerany.

Izay manana maso miantra hotahina, Satria anomezany ho an'ny malahelo ny haniny.

Roahy ny mpaniratsira, dia ho afaka ny fifandirana, Eny, hitsahatra ny ady sy ny fahafaham-baraka.

Izay tia fahadiovam-po, dia milaza soa ny molony. Sady sakaizan'ny mpanjaka izy.

Ny mason'i Jehovah miaro ny manam-pahalalana; Fa ny tenin'ny mpivadika dia foanany.

Hoy ny malaina: Misy liona any ivelany; Ho fatin'ny sasany any an-dàlambe aho.

Ny vavan'ny vehivavy jejo [Heb. vehivavy tsy vadiny] dia lavaka lalina; Izay voaozon'i Jehovah no ho latsaka ao.

Miraikitra amin'ny fon'ny zaza ny hadalana; Fa ny tsorakazo famaizana no hampanalavitra izany aminy.

Izay mampahory ny malahelo dia mampitombo ny hareny; Fa izay manome ho an'ny manana kosa dia mampihena ny hareny.

ATONGILANO ny sofinao, ka henoy ny tenin'ny hendry, Ary ampitandremo ny fahalalako ny fonao;

Fa mahafinaritra raha voatahirinao ao an-kibonao izany, Koa aoka samy ho eo amin'ny molotrao.

Hianao dia hianao no nampahafantariko izany, Mba hitokianao amin'i Jehovah.

Tsy efa nanoratra zava-tsoa ho anao va aho, Izay misy hevitra tsara sy fahalalana,

Mba hampahafantariko ny fahamarinan'ny teny mahatoky hianao, Sy hahazoanao teny holazaina amin'izay naniraka anao?

Aza manosihosy ny malahelo, saingy malahelo izy; Ary aza dia manifakifa ny ory eo am-bavahady;

Fa Jehovah anie ka hisolo vava azy amin'ny adiny. Ary hanimba ny ain'izay manimba azy.

Aza misakaiza amin'ny olona mora tezitra, Ary aza miara-dia amin'ny olona foizina,

Fandrao hianao mianatra ny fanaony Ka mahazo fandrika ho an'ny ainao.

Aza mety ho isan'ny mifandray tanana, Na izay mianto-trosa;

Raha tsy manan-kaloa hianao, Nahoana no dia halainy ny lafika andrianao?

Aza manakisaka ny fari-tany ela, Izay naorin'ny razanao.

Mahita olona mailaka amin'ny raharahany va hianao? Eo anatrehan'ny mpanjaka no hitsanganany, Fa tsy hitsangana eo anatrehan'ny olona ambany izy.

Ohabolana 21 Ohabolana 22 Ohabolana 23

Fitadiavana andininy

Boky Toko Andininy Andininy farany

Louis Segond	Grika TV WH - UBS4
Basic English Bible	Hebreo TT WLC

Fitadiavana teny

Mampidira teny Litera 2 h@ 50 @ alfabeta

Asehoy koa ny ndininy amin'ny dikanteny hafa