Baiboly Malagasy

Mpitoriteny 2: 1-26

Andininy

Protestanta Malagasy

Hoy izaho anakampo: Aoka mba hizahako toetra amin'ny hafaliana hianao, ka dia mifalia amin'ny fahitana ny fahafinaretana; kanjo, indro, zava-poana koa izany.

Hoy izaho, miantso ny fihomehezana: Fahadalana, ary ny fifaliana hoe: Mahefa inona?

Nisaina tato am-poiko hamalifaly ny nofoko tamin'ny divay aho (ny foko anefa mbola hitondra azy amin'ny fahendrena ihany) ary hitana ny fahadalana, mandra-pahitako izay tsara ho an'ny zanak'olombelona ka tokony hataony aty ambanin'ny lanitra amin'ny andro vitsy iainany.

Nanao asa lehibe ho ahy aho, nanao trano, nanao tanimboaloboka,

nanao tanimboly sy saha aho ka namboly hazo fihinam-boa samy hafa karazana tao;

nanao kamory aho handemana ny ala be zana-kazo;

nahazo ankizilahy sy ankizivavy aho sady nanana ompikely; ary nanana fananana be aho, dia omby sy ondry aman-osy mihoatra noho izay rehetra talohako teto Jerosalema.

Nihary volafotsy sy volamena koa aho ary fanaka tsara fanan'ny mpanjaka sy izay avy amin'ny tany samy hafa; ary nahazo mpihiralahy sy mpihiravavy aho mbamin'izay mahafinaritra ny zanak'olombelona, dia vady sy vaditsindrano betsaka.

Dia efa nisandratra mihoatra noho izay rehetra talohako teto Jerosalema aho; ary ny fahendreko anefa dia mbola tato amiko ihany.

Ary na inona na inona nirin'ny masoko dia tsy nisy narovako taminy; tsy nisakana ny foko tamin'izay mety ho fifaliana aho; fa nahazo hafaliana avy tamin'ny fisasarako rehetra ny foko; ary izany no anjarako tamin'ny fisasarako rehetra.

Kanefa nitodika aho nandinika ny asa rehetra nataon'ny tànako sy ny fisasarana nisasarako, ka, indreo, zava-poana sy misambo-drivotra foana izany rehetra izany, tsy nisy nahasoa taty ambanin'ny masoandro.

Ary nitodika aho hijery ny fahendrena sy ny fahaverezan-tsaina ary ny fahadalana fa inona no hataon'ny olona izay handimby ny mpanjaka? Izay efa natao hatramin'ny ela ihany.

Dia hitako fa ny fahendrena dia tsara noho ny fahadalana, toy ny fahatsaran'ny mazava noho ny maizina.

Ny mason'ny hendry dia eo an-dohany, fa ny adala kosa mandeha amin'ny maizina; nefa hitako fa mitovy ihany ny manjo azy roa tonta.

Dia hoy izaho anakampo: Mitovy amin'ny manjo ny adala ihany ny manjo ahy; koa nahoana ary no nanan-tombom-pahendrena aho? Dia hoy izaho anankam-po: Zava-poana koa izany.

Fa samy tsy misy fahatsiarovana mandrakizay na ny hendry na ny adala; fa amin'ny andro ho avy dia samy ho hadino ela izy. Indrisy! samy ho faty na ny adalana ny hendry.

Dia efa halako ny aina, satria nataoko ho ratsy ny asa atao aty ambanin'ny masaondro; fa zava-poana sy misambo-drivotra foana izy rehetra.

Eny, efa halako ny fisasarako rehetra izay nisasarako taty ambanin'ny masoandro, fa havelako ho an'ny olona izay handimby ahy izany,

ary iza no mahalala na ho hendry na ho adala izy? Nefa izy tompon'izay rehetra nisasarako sy nataoko tamin'ny fahendreko taty ambanin'ny masoandro. Zava-poana koa izany.

Dia nitodika aho hampamoy amin'ny fahakiviana ny amin'ny fisasarana rehetra izay nisasarako taty ambamin'ny masoandro.

Fa misy olona izay misasatra amin'ny fahendrena sy ny fahalalana ary ny fahaizana, nefa ny olona izay tsy nisasatra tamin'izany akory no tsy maintsy hamelany azy ho lovany. Zava-poana sy faharatsiana lehibe koa izany.

Fa Inona no azon'ny olona amin'ny fisasarany rehetra sy ny amin'ny fikatsahan'ny fony, izay nisasarany taty ambanin'ny masoandro?

Fa ny androny rehetra dia fanaintainana avokoa, ary ny fisasarany dia fahasorisorena; eny, na dia amin'ny alina aza dia tsy manam-pitsaharana ny fony. Zava-poana koa izany.

Tsy misy mahasoa ny olona mihoatra noho ny mihinana sy misotro ary ny mampahafinaritra ny tenany amin'ny fisasarany. Izany koa aza dia efa hitako fa avy amin'ny tànan'Andriamanitra

(fa iza no mahalany, ary iza no mahazo manararn-po mihoatra noho izaho?).

Fa ny olona izay ankasitrahan'Andriamanitra dia omeny fahendrena sy fahalalana ary fifaliana; fa ny mpanota kosa ampiasainy hanangona sy hamory, mba hisy homeny izay ankasitrahan'Andriamanitra. Zava-poana sy misambo-drivotra foana koa izany.

Mpitoriteny 1 Mpitoriteny 2 Mpitoriteny 3

Fitadiavana andininy

Boky Toko Andininy Andininy farany

Louis Segond	Grika TV WH - UBS4
Basic English Bible	Hebreo TT WLC

Fitadiavana teny

Mampidira teny Litera 2 h@ 50 @ alfabeta

Asehoy koa ny ndininy amin'ny dikanteny hafa