Baiboly Malagasy

ITimoty 5: 1-25

Andininy

Protestanta Malagasy

Aza mamely mafy loatra ny anti-panahy, fa anaro toy ny ray izy, ny tanora fanahy toy ny rahalahy,

ny vehivavy anti-panahy toy ny reny, ny tanora fanahy toy ny anabavy, amin'ny fahadiovana rehetra.

Omeo voninahitra ny mpitondratena izay efa mpitondratena tokoa.

Fa raha misy mpitondratena manana zanaka na zafy, aoka ireo hianatra aloha haneho izay toe-panahy araka an'Andriamanitra amin'ny ao an-tranony ka hamaly soa ny rainy aman-dreniny; fa izany no ankasitrahana eo anatrehan'Andriamanitra.

Fa izay efa mpitondratena tokoa ka irery tena dia efa nanantena an'Andriamanitra ka maharitra amin'ny fangatahana sy ny fivavahana andro aman-alina.

Fa izay vehivavy manara-po amin'ny fahafinaretana dia maty fahavelony.

Ary izany zavatra izany no andidio, mba tsy hananany tsiny.

Fa raha misy tsy mamelona ny azy, indrindra fa ny ankohonany, dia efa nandà ny finoana izy ka ratsy noho ny tsy mino.

Aza soratana ho isan'ny mpitondratena izay latsaka noho ny enimpolo taona sady efa nanam-bady indray mandeha ihany

ary tsara laza amin'ny asa tsara: raha mamelon-jaza izy, raha nampiantrano vahiny, raha nanasa ny tongotry ny olona masina, raha namonjy ny nozoim-pahoriana, raha nazoto nanaraka ny asa tsara rehetra.

Fa mandava ny mpitondratena tanora; fa raha tsy maharitra ny fifehezan'i Kristy izy, dia ta-hanambady

ka hahazo fahamelohana, satria nandà ny finoany voalohany izy.

Sady mianatra ho malaina koa izy ka mandehandeha mitety trano; ary tsy malaina ihany, fa mpilazalaza sy mpandehandeha miraharaha ny an'olona ka manao teny tsy mety.

Koa tiako ny mpitondratena tanora fanahy hanam-bady sy hanana zanaka sy hanapaka ny tranony ka tsy hanome vava ny fahavalo hiteny ratsy.

Fa ny sasany efa nivily nanaraka an'i Satana.

Raha misy vehivavy mino manana mpitondratena, aoka izy hamelona azy, ary aza avela hahavaky tratra ny fiangonana, mba hamelomany izay efa mpitondratena tokoa.

Aoka ny loholona izay mitondra tsara hatao tokony hahazo fanajana roa heny, indrindra fa izay mikely aona amin'ny teny sy ny fampianarana.

Fa hoy ny Soratra Masina: Aza manakombona ny vavan'ny omby mively vary hianao (Deo. 25. 4). Ary koa: Ny mpiasa miendrika hahazo ny karamany (Lio. 10. 7).

Aza mandray teny hiampangana loholona, raha tsy misy vavolombelona roa na telo.

Izay manota dia anaro eo anatrehan'ny olona rehetra, mba hatahotra koa ny sasany.

Mananatra anao mafy aho eo anatrehan'Andriamanitra sy Kristy Jesosy ary ny anjely voafidy mba hotandremanao izany zavatra izany, tsy manao olon-tiana, na manao na inona na inona amin'ny fiangarana.

Aza malaky mametra-tànana amin'ny olona na iza na iza, ary aza miombona ota amin'ny sasany; tehirizo madio ny tenanao.

Aza misotro rano intsony, fa misotroa divay kely noho ny vavafonao sy ny fahosaosanao matetika.

Ny fahotan'ny olona sasany miharihary ka mialoha ho amin'ny fitsarana, fa ny an'ny sasany kosa manaraka ato aoriana.

Ary miharihary toy izany koa ny asa tsara; ary izay tsy toy izany dia tsy ho azo afenina.

ITimoty 4 ITimoty 5 ITimoty 6

Fitadiavana andininy

Boky Toko Andininy Andininy farany

Louis Segond	Grika TV WH - UBS4
Basic English Bible	Hebreo TT WLC

Fitadiavana teny

Mampidira teny Litera 2 h@ 50 @ alfabeta

Asehoy koa ny ndininy amin'ny dikanteny hafa